काठमाडौं- राष्ट्रपति डा. रामबरण यादबले मन्त्री हुँदा राज्यकोषबाट दसैं खर्चका रुपमा लिएको रकम ११ वर्षपछि फिर्ता गरेका छन् ।
उनले मन्त्री हुँदा आर्थिक वर्ष २०५६/५७ मा दसैं खर्चबापत राज्यकोषबाट लिएको ८ हजार ५ सय रुपैयाँ फिर्ता गरेका हुन् ।
राष्ट्रपति डा. यादबले त्यसबेला लिएको दसैं खर्च रकमलाई महालेखा परीषकको कार्यालयले बेरुजु देखाएको थियो । महालेखाले सो रकमलाई असुलउपर गर्नुपर्ने बेरुजुअन्तर्गत देखाएपछि प्रधानमन्त्री तथा मन्त्रिपरिषद् कार्यालयले रकम बुझाउन डा. यादबलाई अनुरोध गरेको थियो ।
डा. यादबले सो रकम २०६८ पुसमा राज्यलाई फिर्ता गरेका हुन् । त्यस्तै उनले आर्थिक वर्ष ५७/५८ मा पनि मन्त्री भएकै समयमा लिएको १७ हजार रुपैयाँ पनि सोही मितिमा फिर्ता गरेका हुन् ।
प्रधानमन्त्री तथा मन्त्रिपरिषद्को कार्यालयले डा. यादबले लिएको दसैं खर्चबापतको र कम फिर्ता भएको महालेखा परीषकको कार्यालयलाई ४ असार २०६९ मा जानकारी गराएको हो । महालेखा परीषकको कार्यालयले आर्थिक वर्ष २०६९/७० को लेखापरीक्षण प्रतिवेदनमा राष्ट्रपतिले सो मितिमा लिएको दसैं खर्च बेरुजु हटाइने छ ।
