मन्त्री भन्छन् ‘बरु आत्महत्या गर्छु, छाड्दिनँ’
काठमाडौं- अन्य देशको पर्मानेन्ट रेसिडेण्ट (पीआर) र ग्रीनकार्ड लिएका कर्मचारीलाई कारबाही गर्न प्रक्रिया अगाडि बढाएको सामान्य प्रशासन मन्त्रालयलाई प्रक्रिया रोक्न चर्को दबाव आएको छ ।
स्रोतका अनुसार पीआर र ग्रीनकार्ड लिएका कर्मचारीलाई कारबाहीका लागि पहल गरेका सामान्य प्रशासनमन्त्री लालबाबु पण्डितलाई उनकै पार्टी एमाले भित्र र बाहिरबाट त्यस्तो दबाव आएको हो ।
तर मन्त्री पण्डितले कारबाही गरेरै छाड्ने अडान लिएका छन् । पीआर र ग्रीनकार्ड लिएका कर्मचारीको तथ्याङ्क संकलन गरिरहेको मन्त्रालयमा त्यसलाई रोक्न कर्मचारी यूनियन मार्फत पार्टीबाटै दबाव आएको मन्त्री निकट स्रोतले जनाएको छ ।
‘पीआर र ग्रीनकार्ड होल्डर कर्मचारीलाई कारबाहीका लागि अहिले भइरहेको तथ्याङ्क संकलन गर्ने काम नै रोक्न यूनियन र आफ्नै पार्टीबाट मन्त्री ज्यूलाई दबाव आएको छ’ स्रोतले भन्यो ।
तर मन्त्री लालबाबु पण्डितले कुनै हालतमा आफू पछि नहट्ने अडान लिएका छन् । उनले ‘आत्महत्या गर्न तयार तर कारबाही नरोक्ने’ बताए । ‘यस्ता कुनियत, भ्रष्ट र राष्ट्रघातीलाई बचाउन पहल गर्ने मान्छे पनि रहेछन्’ उनले भने, ‘मैले कारबाही गर्ने भनेको छु, कसैको दबावले म पछि हट्दिनँ ।’
