बैतडी- अत्यावश्यक सेवाका लागि राखिएको टेलिफोनमा सेक्स प्रस्ताव आएपछि बैतडीका प्रहरी हैरान भएका छन् ।
सर्वसाधारणको सुविधाका लागि जिल्ला प्रहरी कार्यालय बैतडीले कन्ट्रोल कक्षमा राखेको ‘१००’ नम्बरको टेलिफोनमा ब्लफ कलको ओइरो लागेको हो । निरन्तर आइरहने ब्लफ कलले ड्युटीमा खटिने प्रहरीहरुमा हैरानी परेको छ ।
प्रहरीको कन्ट्रोलमा रहेको ‘१००’ नम्बरमा निःशुल्क फोन गर्न सकिने भएकाले पनि ब्लफ कलहरु निरन्तर आइरहने प्रहरी कार्यालय स्रोतले बतायो ।
फोन गर्नेहरुले गालीदेखि यौन प्रस्ताव समेत राख्ने गरेका छन् । कन्ट्रोलमा आउने ब्लफ कलहरुमा युवतीहरुले अश्लिल र छाडा शब्दहरु प्रयोग गर्नुका साथै यौन प्रस्ताव समेत राख्ने गरेका छन् भने कम उमेरका युवाहरुले गाली गर्ने गरेको एक प्रहरीले बताए ।
ब्लफ कल नगर्न आग्रह गर्दा उल्टै युवतीहरुले प्रहरीहरुलाई नै जिस्काउने गरेका छन् । ‘रातभरि फोन गरेर हैनन पार्छन, फोन नगर भन्दा पनि मान्दैनन्’ –ड्युटीमा रहेका प्रहरीले भने ।
ब्लफ कल सबैभन्दा बढी एनसेलको नम्बरबाट आउने गरेको जिल्ला प्रहरी कार्यालय बैतडीले जनाएको छ । त्यस्ता नम्बरहरुलाई निगरानीमा राख्न पनि समस्या भइ रहेको प्रहरी कार्यालेले बतायो ।
