काठमाडौं- युवती बेपत्ता प्रकरणले दिल्ली दूतावासका दुई कर्मचारी निलम्बनमा परेका छन् ।
नेपाली दुतावासमा आश्रित युवतीहरु आइतबार बिहानबाट एकाएक बेपत्ता बनेपछि सुरक्षा कमजोरीको कारण जनाउँदै राति चौकिदारीमा खटिएका दुई स्थानीय कर्मचारी निलम्बनमा परेका छन् ।
युवती बेपत्ता प्रकरण पछि बुधबार भएको प्रारम्भिक छानबिनमा राति १० देखि बिहान ६ बजेसम्म चौकिदार जिम्मेवारीमा खटिएका गणेश पौडेल र रघु ज्ञवालीलाई तत्कालका लागि निलम्बन गरिएको दुतावासका एक अधिकारीले बताए । दिल्लीको कोठीमा बेच्न ल्याइएका दुई तामाङ किशोरीलाई स्थानीय नेपाली समाजका प्रतिनिधिले उद्धार गरेर गत शुक्रबार दिउँसो दुतावासको जिम्मा लगाएका थिए ।
यी किशोरीका साथमा यी दुईलाई ४ लाख रुपैयाँमा बिक्री गर्न दिल्ली ल्याउने सिन्धुपाल्चोककै एजेन्ट फूलमाया तामाङलाई पनि दुतावासको जिम्मा लगाइएको थियो । दुतावासको आश्रयस्थलमा रहेका तीनैजना युवती आइतबार बिहानबाट बेपत्ता बनेपछि मात्रै दुतावासका जिम्मेवार अधिकारीले पत्तो पाएका थिए ।
