भीमफेदी–कुलेखानी सडक मर्मत तथा स्तरोन्नति गरिदैं

काठमाडौं – हेटौंडा हुँदै काठमाडौं छिर्ने छोटो मार्ग हेटौंडा–भीमफेदी–कुलेखानी–काठमाडौं रुट अन्तर्गत भीमफेदी–कुलेखानी सडकखण्डको मर्मत तथा स्तरोन्नति बिहीबारदेखि सुरु भएको छ । सडक मर्मत अवधिभर एक महिना उक्त मार्गमा विहान ९ बजेदेखि साँझ ६ बजेसम्म आवतजावत बन्द हुने डिभिजन सडक कार्यालय हेटौंडाले जनाएको छ ।

डिभिजन सडक कार्यालयले उक्त सडक खण्डको जिम्मा पाएको एक वर्षमै सडक मर्मत थालेको हो । भीमफेदी–कुलेखानीको १५ किलोमिटर लम्बाई सडकमध्ये भीमफेदीदेखि उत्तर चार किलोमिटर खण्ड छाडेर बाँकी ११ किलोमिटर सडक कालोपत्रे (ओभर ले) गर्न लागिएको कार्यालयका इन्जिनियर सुमन योगेशले जानकारी दिए ।

‘एक महिनामा बाटो मर्मत सकिन्छ’, इन्जिनियर योगेशका अनुसार दुई करोड ६५ लाख ३६ हजार तीनसय १२ रुपियाँमा उक्त ठेक्का सपना निर्माण सेवा हेटौंडाले लिएको छ । ***