दमक- नेकपा एमालेका नेता तथा पूर्व उपप्रधानमन्त्री केपी शर्मा ओलीले एकिकृत नेकपा माओबादीले आफ्नो अधिनायकबाद लाद्नलाई संबिधानसभाको अवहासन गराएको र त्यो सम्भब नभएपछि फेरी संबिधानसभाको पुर्नस्थापनाको कुरा गर्न थालेको बताउनुभएको छ ।
नेकपा एमाले संबिधानसभाको पुर्नस्थापनाको पक्षमा नरहेको र सहमतिय सरकार निर्माण गरेर राजनैतिक गतिरोध तथा संबैधानीक रिक्तताको अन्त्यको पक्षमा रहेको उहाँले बताउनुभयो ।
मंगलबार बिहान झापाको दमकमा कुराकानी गर्दै नेता ओलीले संबिधानसभाको बनौटनै गलत ढङ्गको रहेका कारण संबिधानसभामार्फत संबिधान आउन नसकेको भन्दै त्यहि संबिधानसभा ब्युत्याउने कुरा गर्नुमा कुनै तुक नरहने दाबी गर्नुभएकोछ ।
एकिकृत नेकपा माओबादीले देश र जनता भन्दा पनि आफु अनुकुल सोचेर काम गर्ने बताउदै ओलीले भन्नुभयो’संबिधानसभाको जुन अभ्यास चार बर्षमा भयो त्यो अभ्यासनै असफल साबित भयो ।’
संबिधानसभाको निर्वाचन अनुपयुक्त समयमा,अनुपयुक्त तरिकाले गरिएकाले त्यसको परिणामा पनि अनुपयुक्त नै आएका कारण आज यो अवस्था आएको भन्दै कसैका कारण नभइ दलहरुको अदुरदर्शिताको परिणाम भएको पनि उहाँको भनाई रहेको थियो ।
संबिधानसभा आफै भङ्ग हुने अवस्था नआएको र यसलाई भङ्ग गराइएको भन्दै उहाँले भन्नुभयो’न्युजित रुपमा संबिधानसभाको भङ्ग गराइएकाले यसलाई ब्युत्याउने बिषयमा एमालेले यथास्थितिमा छलफल समेत गर्दैन ।’
एकिकृत नेकपा माओबादीको नेतृत्वको सरकार तथा प्रधानमन्त्री डा.बाबुराम भट्टराइ कामचलाउ प्रधानमन्त्री भइसकेकाले दलहरुले नयाँ प्रधानमन्त्रीको नाम सर्बसम्मत रुपमा ल्याइसकेपछि स्वतःयो सरकार बिस्थापित बन्ने नेता ओलीले जनाउनुभयो ।
