विराटनगर– नेकपा एमाले अध्यक्ष झलनाथ खनालले प्रधानमन्त्री बाबुराम भट्टराईले मनोमानी ढंगले राजनैतिक निर्णय गर्दा सिंगो देश संकटमा फसेको बताउनुभएको छ ।
कोशी अञ्चलस्तरीय अगुवा कार्यकर्ता भेलालाई सम्वोधन गर्न सोमबार बिहान विराटनगर आउनुभएका अध्यष खनालले सबै राजनीतिक दलहरुको सहमतिमा राजनीतिक निकास खोज्नुपर्ने बताउनुभयो । विमानस्थल ओर्लेसँगै पत्रकार सम्मेलन गरी उहाँले सबै राजनीतिक दलहरुको सहमतिमा मात्रै अहिलेको सरकारले पूर्ण बजेट ल्याउनुपर्ने बताउनुभयो ।
सरकारले दलहरुको सहमित बिना बजेट ल्याए एमालेले त्यसको विरोध गर्ने पनि उहाँको भनाई छ । कस्तो विरोध गर्ने भन्ने बारे भने उहाँले परिस्थिति हेरेर मात्रै निर्णय गरिने पनि जानकारी दिनुभयो । ‘सरकारले पूर्ण बजेट ल्याउनुपर्छ,” उहाँले भन्नुभयो , ‘पूर्ण बजेट नल्याउने हो भने देश आथिर्क संकटमा फस्छ ।‘ पूर्ण बजेटले देशको अर्थतन्त्र गतिशिल बन्ने उहाँको भनाई थियो ।
यसैबीच उहाँले प्रधानमन्त्री भट्टराईकोआफ्नै हठले सिंगो देश दिनदिनै संकटमा फसेको आरोप लगाउनुभयो । बाबुरामको राजनीतिक औचित्य समाप्त भइसकेकोले नैतिकरुपमा सत्तामा बसिरहनु नहुने उहाँले बताउनुभयो । ‘संविधान सभा विघटन भएसँगै बाबुराम सरकारको आधिकारिकता सकिएको छ,’ उहाँले भन्नु भयो ।
अब सबै दलहरुको सहमतिमा आधिकारिक सरकार बनाएर देशलाई निकास दिनुपर्छ अध्यक्ष खनालको भनाई छ ।