काठमाडौं– एमाले नेता भीम रावलले यथास्थितिमा कामचलाउ प्रधानमन्त्रीले बोलाएको विशेष समिति बैठकमा एमाले सहभागी नहुने बताए ।आज रिपोर्टस क्लब नेपालको साक्षात्कारमा बोल्दै उनले भने–‘मुलुकमा जनप्रतिनिधिविहीन स्थिति सिर्जना गर्ने व्यक्ति प्रधानमन्त्री भट्टराई हुन् । उनले संविधानमा प्रधानमन्त्री हटाउने व्यवस्था नभएको जिकिर गरेका छन्, प्रधानमन्त्री बस्ने व्यवस्था पनि संविधानमा छैन,’ रावलले भने– मै सबै हुँ भन्ने हठ त्यागेर प्रधानमन्त्रीले राजीनामा दिनुपर्छ अन्यथा जनताले सडकबाट बर्खास्त गरिदिन्छन् ।
संवैधानिक रुपमा राष्ट्रपतिले प्रधानमन्त्रीलाई हटाएर नयाँ सरकार बनाउने प्रक्रियामा अघि बढाउनुपर्ने पनि उनले बताए ।
उनले भने– पहिलो निकास प्रधानमन्त्रीको बहिर्गमन हो, दोस्रो, राष्ट्रिय सहमतिको नयाँ सरकार बनाएर चुनावको मिति तोक्ने तेस्रो, दुई वर्षका लागि चुनाव गराउने र छ महिनाभित्र संविधान जारी गर्ने र त्यसलाई नै संसदका रुपमा अघि बढाउने नै अहिलेको निकास हो ।
