काठमाडौं – नेपाल पत्रकार महासंघ केन्द्रीय कार्यसमितिको पाँचौ बैठक आजदेखि दोलखाको सदरमुकाम चरिकोटमा सुरु भएको छ । चरिकोटस्थित पानारोमा रिसोर्टमा दुई दिनसम्म बस्ने बैठकले प्रेस स्वतन्त्रता, पत्रकारहरूको सुरक्षा र आगामी दिनमा महासंघले खेल्नुपर्ने भूमिकाका विषयमा ठोस योजना बनाउने बताईएको छ ।
बैठकमा राजनीतिक सहमति टुटेको र संविधानसभा भंग भएको संक्रमणकालीन अवस्थामा पत्रकारहरूको भूमिकाका विषयमा गम्भीर छलफल हुने महासंघका महासचिव ओम शर्माले जानकारी दिनुभयो ।यस्तै बैठकले आगामी वार्षिक साधारणसभाको एजेण्डा तय गर्नुका साथै अर्धवार्षिक कार्य योजनासमेत बनाउने जनाइएको छ ।
यसैबीच नेपाल पत्रकार महासंघका केन्द्रीय अध्यक्ष शिव गाउँलेले नेपाली प्रेस जगत इतिहासकै सबैभन्दा संकटपूर्ण अवस्थामा गुज्रिरहेको बताउनुभएको छ । महासंघको दोलखा शाखाको निर्माणाधीन भवन शिलान्यासपछि आयोजित कार्यक्रममा उहाँले व्यवसायिक र भौतिकरुपमै प्रेस जगत असुरक्षित भएको भन्दै पत्रकारले यसअघि कहिल्यै भोग्नु नपरेको सकस अहिले भोगिरहेको बताउनुभयो । महासंघका महासचिव ओम शर्माले राजधानीमै दिनदहाडै पत्रकार कुटिनु प्रेसजगतमाथिको क्रुर आक्रमण हो भन्नुभएको छ । ***