प्रधानमन्त्री भट्टराई ब्राजिल पुगे

ब्राजिल- प्रधानमन्त्री बाबुराम भट्टराई दिगो विकाससम्बन्धी संयुक्त राष्ट्रसङ्घीय सम्मेलनमा भाग लिने सिलसिलामा मङ्गलबार यहाँ आइपुगेका छन्।

असार ६ देखि ८ गतेसम्म हुने सम्मेलनमा २१ सदस्यीय नेपाली प्रतिनिधिमण्डलको नेतृत्व गर्दै उनी स्थानीय समयअनुसार अपराह्न ३ बजे आइपुगेका हुन्।

प्रधानमन्त्रीलाई नेपाली राजदूत प्रद्युम्नविक्रम शाह, ब्राजिलको विदेश मन्त्रालयका शिष्टाचार अधिकृत जोनास्पालोस्ची र राष्ट्रसङ्घीय अधिकृतहरुले रियो द जेनेरियो अन्तर्राष्ट्रिय विमानस्थलमा स्वागत गरेका थिए।

प्रधानमन्त्री भट्टराईले सम्मेलनको प्लेनरी बैठकलाई बुधबार बिहान सम्मेलनस्थल रियोसेन्ट्रो कन्भेन्सन सेन्टरमा सम्बोधन गर्ने कार्यक्रम छ। प्रधानमन्त्रीले राष्ट्रसङ्घीय महासचिव वान-कि मुन र नर्वेली प्रधानमन्त्रीलाई सम्मेलनकै सिलसिलामा बुधबार भेट्नेछन्।