कार्यकर्ताले भने- एकल पहिचान नमान्नू
काठमाडौं- आदिवासी जनजाति र मधेसी नेताहरुको असन्तुष्टि एमालेभित्र झन् चुलिने भएको छ । राष्ट्रिय कार्यकर्ता भेलाले एकल पहिचान नमान्न नेतृत्वलाई सुझाव दिएपछि असन्तुष्टि झन् चुलिने भएको हो ।अगुवा कार्यकर्ताले एकल जातीय पहिचानको आधारमा राज्य पुर्नसरचना गर्ने मागलाई कुनैपनि हालतमा स्वीकार नगर्न नेतृत्वलाई सुझाब दिएका हुन् । उनीहरुले बहुजातीय पहिचानका आधारमा मिश्रित नाम सहितको संघीयतामा अडिग रहन पार्टीलाई सुझाब दिएका हुन् ।
अध्यक्ष झलनाथ खनालले पेश गरेको राजनीतिक प्रतिबेदनमाथिको छलफलका लागि बनाईएका सबै ६ वटा समुहका टोली नेताहरुले मंगलवार पालै पालो छलफलको निष्कर्ष सुनाउदै बहुपहिचानको पक्षमा अडिग रहेर देश र पार्टी भित्रको समस्या समाधान गर्न सुझाब दिएको श्रोतले जनाएको छ ।
उनीहरुले पार्टीका असन्तुष्ट नेताहरुलाई अझै पनि पार्टीमा आएर आफ्ना कुरा राख्न आग्रह गर्ने र छलफलबाटै समस्या समाधान गर्ने पक्षमा पार्टी नेतृत्व उभिनुपर्ने सुझाब दिएका छन् । असन्तुष्ट नेताहरु भेलामा समेत उपस्थित नभएकोमा उनीहरुले दुख ब्यक्त गरेका छन् ।
एमालेले एकल पहिचान नमान्दा संविधानसभा विघटन भएको आरोप लगाउँदै एमालेका आदिवासी जनजाति र मधेसी नेताहरु कुनै पनि बैठकमा सहभागी भएका छैनन् ।
