काठमाडौं– नेकपा एमालेका अध्यक्ष झलनाथ खनालले संविधान निर्माणमा रहेका विवादहरुलाई तत्कालै समाधान गरी जेठ १४ लाई सुखद् र ऐतिहासिक दिन बनाउन चाहेको बताउनुभएको छ ।शान्ति र संबिधान लेखनका लागि नागरिकस्तरबाट सुझाव लिन थालिएको विशेष टेलिफोन सम्वादमा शनिबार कञ्चरनपुरवासीसँग कुरा गदै उहाँले मुलुकको भाग्य र भविष्यलाई सुन्दर बनाउन निर्धारित समयमै नयाँ संबिधान ल्याउनुको विकल्प नभएको बताउनुभयो । विवादित विषयमा सहमतीको धेरै निकट पुगेको जानकारी दिदै उहाँले जेठ १४ लाई कुनैपनि राजनीतिक दलले दुखद दिन बनाउन नचाहेकोले तोकिएको समयमै नयाँ संबिधान आउनेमा आशंका नगर्न आग्रह गर्नुभयो ।
शुक्रबार मात्रै कैलालीमा हतियार भेटिएको प्रसंगमा अध्यक्ष खनालले हतियार बाहिर राखेर अगाडि बढाइएको शान्ति प्रक्रियाले जनतामा रहेको दिगो शान्ति र समृद्धिको अपेक्षालाई कुठराघात गर्ने वताउनुभयो ।
खनालले एमाले कञ्चनपुरका अध्यक्ष ईश्वरीप्रसाद खरेल, कांग्रेसका जिल्ला सचिव भोजरान बोहोरा, एकीकृत माओवादीका जिल्ला ईन्चार्ज डीजी पाण्डे, महिला प्रतिनिधि लक्ष्मी विक, नागरिक अगुवा भवराज जोशी, जनजातिका बलबहादुर डगौरा र अधिकारकर्मी भगत विकसँग कुराकानी गर्नुभयो ।
