काठमाडौं– माओवादी बरिष्ठ उपाध्यक्ष मोहन वैद्य समूहले लडाकु शिविर नेपाली सेनालाई जिम्मा दिने निर्णयको विरोधमा बुधबार अध्यक्ष पुष्पकमल दाहाल र प्रधानमन्त्री बाबुराम भट्टराईको पुतला दहन गर्ने भएको छ ।
प्रधानमन्त्री भट्टराईले शिविर जिम्मा दिन प्रधानसेनापति छत्रमानसिंह गुरुङलाई निर्देशन दिएलगत्तै वैद्य पक्षले राजधानीमा पत्रकार सम्मेलन गरी आन्दोलनको घोषणा गरेको हो । ‘बुधबार बिहान १० बजेदेखि एक घण्टा देशभर चक्काजाम गर्ने निर्णय गरेका छौं,’ वैद्यपक्षीय सचिव सीपी गजुरेलले भने, ‘अध्यक्ष र प्रधानमन्त्रीको पुतला पनि जलाउँछौं ।’
वैद्य पक्षले सेनालाई शिविर जिम्मा दिने निर्णय आत्मसमर्पणको पराकाष्ठा भनी टिप्पणी गरेको छ । यसैबीच मंगलबारै विज्ञप्ती जारी गर्दै वैद्य र महासचिव रामबहादुर थापाले सेना समायोजन विशेष समितिको निर्णयको विरोध गरेका छन् । ***