काठमाडौँ- नेकपा एमालेका अध्यक्ष झलनाथ खनालले एमाले मधेसविरोधी नरहेको बताएका छन् । केही संकीर्णहरुले मात्रै एमालेलाई मधेश विरोधीको आरोप लगाएको उनले बताए । शान्ति र संविधान निर्माणमा जनमत बुझ्न हिजोदेखि थालेको टेलिफोन सम्बादको आज दोस्रो दिन सर्लाही जिल्लाका पार्टीका नेता, नागरिक समाजका अगुवा, बुद्धिजीवी तथा संचारकर्मीहरुसँग कुरा गर्दै उनले यस्तो बताएका हुन् ।आफ्नै निबास डल्लुबाट उनले एमाले सर्लाहीका अध्यक्ष मनोजकुमार देबकोटा, बुद्धीजिबी कृष्णप्रसाद भट्टराई, नागरिक समाजका अगुवा डाक्टर सियाराम कुशवाह र संचारकर्मी चुडामणी वाग्लेलाई टेलिफोन गरेका थिए ।
भोलि खनालले हिमालपारीको जिल्ला मुस्ताङका पार्टीका नेता, नागरिक समाजका अगुवा, बुद्धीजिबी तथा संचारकर्मीहरुसंग संवाद गर्ने कार्यक्रम रहेको उनका स्वकीय सचिव रामबाबु अधिकारीले जानकारी दिए । अध्यक्ष खनालको यो अभियान शान्ति र संविधान निर्माणले पुर्णता नपाउँदासम्म दैनिक विहान ९ वजे देखि ९.४५ वजे सम्म जारी रहने बताइएको छ।
