काठमाडौं- घाँटीमा रहेको हड्डीको समस्या (स्पन्डोलोटिक सर्भिकल माइलोप्याथी) का कारण जापान पुगेर शल्यचिकित्सा गराएर फर्केका उपप्रधान एवं परराष्ट्रमन्त्री नारायणकाजी श्रेष्ठ अझै सन्चो हुन सकेका छैनन् ।नेपालका सम्बद्ध चिकित्सकको परामर्शमा जापान गएर सर्ज गराएका उनी अहिले पनि मन्त्रालयको काम घरमै बसेर गरिरहेका छन् । ‘स्पाइनल कर्डमा घाउ देखिएपछि डेढ महिनाअघि९जनवरी १९ मा० सर्ज गराएको थिएँ । सर्जपछि कम्तीमा तीन महिना टाउकोलाई आराम दिनुपर्ने सुझावअनुसार आरामीमा बसेको हुँ,’ उनले भने । अति आवश्यक काम घरबाटै र सातामा तीन चार दिन एक दुई घण्टा मन्त्रालयमा बसेर पनि काम गर्ने गरेको उनले बताए ।
नेपालमै हुने उपचारका लागि जापान गएको भनी आलोचना गरेकोमा उनले चित्त दुःखाए । ‘यो घाउ बढ्दै गएमा प्यारालाइसिसको खतरा रहने जानकारी पाएपछि म सर्जमा हतारिएको थिएँ । मेरो घाटीबाट हातका दुबैतर्फ जाने नशा पनि थिचिएका थिए । मेरा टाउकाका बिभिन्न पाटोमा चारवटा सर्ज भएका छन्, खाँदिएको स्पाइनल-कर्डलाई स्पेश दिन सर्ज समेत भएको छ,’ उनले भने, ‘यत्ति गम्भीर कुरालाई भ्रष्टाचारमा लगेर जोडेकोमा दुःख लागेको छ ।’
श्रेष्ठले आफू मेडिकल काउन्सिलको सिफारिसमा नै जापान गएको बताए । उनले आफूलाई जापान जान प्रधानमन्त्री बाबुराम भट्टराई, माओवादी अध्यक्ष पुष्पकमल दाहाल, पार्टीका नेता र नेपाली चिकित्सकहरुले सल्लाह दिएकोसमेत बताए ।
प्रधानमन्त्रीसँग पनि असन्तुष्टि
श्रेष्ठले आफू विरामी हुँदा पनि एक महत्त्वपूर्ण बैठकका लागि प्रधानमन्त्रीले कार्यालय बोलाएर ‘मानसिक दबाब’ दिएको निकतवर्तिहरुसँग बताउने गरेका छन् । ‘मैले नभेटि नहुने भए तपाईं नै आउनुस् म सक्दिन’ भनेपछि उहाँ नै मेरो निवास आउनुभयो,’ उनको भनाइ हुने गरेको छ ।
