काठमाडौं- माओवादी अध्यक्ष पुष्पकमल दाहाल ‘प्रचण्ड’ले पर्यटन तथा नागरिक उड्ययन मन्त्री लोकेन्द्र विष्ट मगर यूएईको आवुधावी विमानस्थलमा भिसा नहुँदा अध्यागमनको नियन्त्रणमा परेको विषयले मुलुककै शिर निहुरिएको प्रतिक्रिया दिएका छन् ।‘जे भयो त्यो राम्रो भएन,’ बिहीबार आफ्नै निवासमा दाहालले पत्रकारहरुसँग भने, ‘यो घटनाले देश, मन्त्री, कर्मचारी र पार्टी कसैको राम्रो भएन । यसले सबैको शिर निहुर्याएको छ ।’
यसैबीच दाहालले आफ्नो दल शान्ति र संविधानमा आत्मसमर्पण गर्न तयार नभएको स्पष्ट पारेका छन् । स्मरण रहोस् पर्यटन मन्त्री माओवादीकै पोलिट्ब्युरो सदस्य हुन् ।
दाहालले कांग्रेस-एमाले शान्ति प्रक्रिया र संविधान निर्माणलाई अलग-अलग गरेर भत्काउन उद्दत रहेकोसमेत खुलाए । ‘कांग्रेस-एमाले शान्ति र संविधानलाई अलग अलग गर्न लागेका छन्, त्यो भनेको भत्काउने हो,’ ललितपुरमा नारी दिवसमा भएको कार्यक्रममा उनले बिहीबार भने, ‘अब माओवादी आत्मसमर्पण गर्न तयार छैन ।’
दाहालले चुप लागे शान्ति र संविधान नबन्ने खतरा रहेको भन्दै आन्दोलन तयारी गर्न निर्देशन दिए । ‘शान्ति र संविधान भाँड्न प्रतिक्रियावादी सक्रिय छन्,’ दाहालको भनाइ थियो, ‘शान्ति प्रक्रिया सफल पार्ने षड्यन्त्रकाविरुद्ध आन्दोलन तयारी गर्न जरुरी छ ।’ उनले आफ्नो दल शान्ति प्रक्रिया सम्मानजनक बनाउन लागीपरेको दाबी गरे ।
बिहीबार नै रिर्पोर्टर्स क्लवको ज्ञापन पत्र बुझ्दै दाहालले शान्ति, संविधान र सहमतिको सरकारको विषयमा प्याकेजमै सहमति नबने पनि सेना समायोजन प्रक्रिया सात बुँदे सहमति अनुसार नै टुङ्ग्याउने दृढता व्यक्त गरेका छन् ।
