पटना- बिहारका मुख्य मन्त्री नितिश कुमारले नेपाल र भारत सीमा क्षेत्रमा हुने अपराधिक घटना दुबै देशको समस्या भएको भन्दै आपसी छलफलबाट समाधान गर्नुपर्ने बताएका छन् । उनले सीमा क्षेत्रको व्यवस्थापन गर्ने केन्द्रीय सरकारको जिम्मेवारी भए पनि आफ्नो राज्यमा देखिएका समस्या केन्द्रसमक्ष राख्न सक्ने बताएका हुन ।पटनमा रहेका नेपाली पत्रकारसंग शनिबार उनले केन्द्रीय सरकारबाट हुने निर्णय राज्य सरकारले लागु गर्ने बताए । ‘सीमा समस्या समाधानका लागि केन्द्रीय सरकारले दिल्ली सचिबस्तरीय छलफल गरेको छ । गृह मन्त्रालय तहमा बिस्तृत छलफल भएको छ’ उनले आफ्नै निवास पटनामा शनिबार भने- बिहार सरकार केन्द्रीय सरकारले गरेको निर्णयको पूर्ण समर्थन गर्छ । हाम्रा केही निश्चित संयत्र छन् । समस्या समाधान गर्न दुई पक्षीय छलफल गर्न सकिन्छ ।’
उनले नेपाल र बिहारले बषर्ात्मा हुने डुबान समस्या समाधान गर्न नदीको सही व्यवस्थापन गरे दुबै देशलाई फाइदा हुने जनाए । ‘नेपालमा हिमालबाट आउन पानीको ठिक ढंगले व्यवस्थापन गर्नुपर्छ । नदीको पानी बाढीको रुपमा आएर बिहारमा नोक्सान गरेको छ’ उनको भनाइ छ, ‘पानी व्यवस्थापन गरे, सिंचाई सेवा लिन सके दुबै देशलाई फाइदा हुन्छ । नदी व्यवस्थापन गरी बिजुली निकाले दक्षिण एशियाको सबभन्दा धेरै आयश्रोत भएको देशको रुपमा नेपाल पर्न सक्छ । दुबै देश मिलेर समस्या समाधान गर्नुपर्छ । हामीले प्रकृतिको फाइदा लिनुपर्छ । ‘
