काठमाडौं- नेपाल भ्रमणमा आउनुभएका जापानको मियागीका सांसद हात्सुमासा ओनोडेराले प्रधानमन्त्री डा. बाबुराम भट्टराईलाई भेट गरी नेपालको उच्चशिक्षा, औद्योगिक विकासलगायत क्षेत्रमा सहयोगका सम्भावनाका बारेमा कुराकानी गर्नुभयो ।सो अवसरमा प्रधानमन्त्री डा भट्टराईले नेपालको विकासमा जापान सरकार र जापानी जनताको सहयोग महत्वपूर्ण रहेको र आगामी दिनमा नयाँ नेपाल निर्माणमा पनि सहयोग अझ बढी खाँचो रहेको बताउनुभयो ।
सांसद मियागीले जापानको मियागी युनिभर्सिटीसँग नेपालका विश्वविद्यालयको सम्बन्ध स्थापित गरी उच्च शिक्षामा सहयोग गर्न पानीको शुद्धीकरण, भूकम्पीय सुरक्षा तथा औद्योगिक विकासमा सहयोग गर्न जापान तयार रहेको बताउनुभयो ।
उहाँले गत मार्चमा जापानमा गएको सुनामीबाट भएको जनधनको क्षतिप्रति नेपालले व्यक्त गरेको सहयोग र सद्भावप्रति आभार व्यक्त गर्दै बढी क्षति भएको मियागी क्षेत्रलाई विश्व सम्पदा सूचीमा विकास गरी पर्यटकीय केन्द्रका रूपमा विकास गर्न लागिएको जानकारी दिनुभयो ।
जापानको विकासमा विशिष्ट योगदान राख्न सफल मियागी-जापान-हङकङ समाजका निर्देशकसमेत रहनुभएका ओनोडेराबाट नयाँ नेपाल निर्माणमा धेरै अनुभव लिन सकिने गैरआवासीय नेपाली सङ्घका प्रमुख संरक्षक देवमान हिराचनले बताउनुभयो ।
सांसद ओनोडेराको नेतृत्वमा यही माघ १८ गते आएको पाँच सदस्यीय प्रतिनिधिमण्डलले राष्ट्रपति डा. रामवरण यादव र सभामुख सुवास नेम्वाङसँग पनि भेट गरी सहयोगका सम्भावनाबारे कुराकानी गरेको थियो । ***
