पोखरा- नेपाली कङ्ग्रेस नेता रामशरण महतले शान्ति प्रक्रिया इमान्दारीपूर्वक अघि बढे एकीकृत नेकपा माओवादीसँग सहकार्य सम्भव रहेको बताएका छन् । शान्ति प्रक्रिया विषय नटुङ्गिकन संविधान घोषणा गरिएमा त्यसले मुलुकमा ठूलो खतरा निम्त्याउने उनले बताए। सातबुँदे सम्झौताप्रति एमाओवादीले इमान्दारिता नदेखाएको उनको आरोप थियो ।नेपाल प्रेस युनियन कास्कीले आयोजना गरेको पत्रकार भेटघाट कार्यक्रममा महतले एमाओवादीका शिविरमा रहेका लडाकुको पुनःर्स्थापना र समायोजन, हतियारको व्यवस्थापन र कब्जा गरिएका सम्पत्ति फिर्ता नगर्ने हो भने माओवादीसँग सहकार्य गर्न नसकिने जिकिर गरे ।
‘अहिले काँग्रेसको प्रधानमन्त्री बदल्ने एजेन्डा छैन, शान्ति प्रक्रिया अघि बढाउनका लागि मौका दिन्छौँ, त्यो प्रक्रिया अगाडि नबढ्ने हो भने सरकारको विकल्प खोज्न काँग्रेस बाध्य हुने’, उनले चेतावनी दिए ।
एक महिनादेखि माओवादीका लडाकुको पुनःस्थापना, स्वेच्छिक अवकास र समायोजनका विषयमा कुनै प्रगति नभएको गुनासो बताउँदै उनले देशले धान्न सक्ने, समानुकूल र दिगो हुन सक्ने सङ्घीयताको स्वरुप बनाउनुपर्ने बताए ।
