टोकियो – जापानको शिक्षा तथा श्रम मन्त्रालयको एक अध्ययन अनुसार यस बर्षको मार्च महिनामा जापानका बिश्वबिद्यालयहरुबाट स्नातक तहको पढाइ समाप्त गरेका बिद्यार्थीहरुमध्ये ७१ दशमलब ९ प्रतिशतले बिभिन्न क्षेत्रमा रोजगार पाउने भएका छन् । गत डिसेम्बर १ तारिखसम्मको अध्ययनको आधारमा उक्त कुरा थाहा लागेको हो । उक्त अंक बिद्यार्थीहरुको रोजगार सम्बन्धी अध्ययन शुरु गरिएको बर्ष (सन् १९९६) यता दोस्रो सानो अंकमा पर्दछ । सो अंक गत बर्ष सबैभन्दा कम रहेको थियो । यस हिसाबले हेर्दा नयाँ रोजगारको अवसरमा गत वर्षको तुलनामा केहि सुधार आएको भएतापनि रोजगारीको लागि सहज परिस्थिति भने नभएको जानकारहरु बताउँछन् ।
शिक्षा मन्त्रालय र श्रम मन्त्रालयले जापानको बिभिन्न क्षेत्रका ६२ वटा सरकारी तथा निजी बिश्वबिद्यालयहरुमा उक्त रोजगार सम्बन्धी अध्ययन गरेको थियो । जसमा स्नातक तहको पढाइ सकेर जागिर खान चाहने बिद्यार्थीहरुको हिस्सा ७५ दशमलब ४ प्रतिशत रहेको थियो । त्यसमध्ये ७३ दशमलब १ प्रतिशत पुरुष र ७० दशमलब ५ प्रतिशत महिला बिद्यार्थीहरुले बिभिन्न क्षेत्रमा जागिर पाउने भएका हुन् । जुन अंक गत बर्षको सोहि अवधिको तुलनामा पुरुष बिद्यार्थीको हकमा ३ प्रतिशत र महिला बिद्यार्थीको हकमा ३ दशमलब १ प्रतिशतले बृद्धि भएको छ ।
गत बर्षको तुलनामा रोजगारको अवस्थामा केहि सुधार आएको देखिए तापनि झण्डै ३० प्रतिशत बिद्यार्थीहरुले आफ्नो पढाइ सकेर पनि रोजगारमा लाग्न नसकेको स्थिति जापानी सरकारको लागि एउटा ठूलो चुनौतीको रुपमा आगाडी आएको छ । यसलाई कम गर्न रोजगार सम्बन्धी जानकारी दिइ सहयोग गर्नको लागि सरकारी स्तरबाट पनि हेलो वर्क जस्ता बिभिन्न निकायको स्थापना गरिनुका साथै बिभिन्न किसिमका उपायहरु अवलम्बन गर्ने गरिएको पाइन्छ ।
