काठमाडौं– शान्ति, संविधान र सरकारका विषयमा छलफल गर्न एकीकृत नेकपा माओवादीको केन्द्रीय कार्यालयको बैठक बस्दैछ । केन्द्रीय कार्यालयको बैठकले शान्ति, संविधान र सरकारका लागि नयाँ कार्यक्रम ल्याउन समय लाग्ने भएका कारण आज बिहान ११ बजे बोलाइएको केन्द्रीय समिति बैठक अन्यौलमा परेको नेताहरुले बताएका छन् ।माओवादीको असन्तुष्ट उपाध्यक्ष मोहन बैद्य किरण पक्षले सरकारमा रोजेका मन्त्रालय पाउने भएपछि माओवादी भित्रको विवाद तत्कालका लागि साझा कार्यक्रममा पुगेर सकिएको छ । त्यसका लागि अध्यक्ष पुष्पकमल दाहाल प्रचण्डले बिहानैदेखि अनौपचारिक छलफल थाल्नुभएको छ ।
सरकार पुनर्गठन गर्ने, वैद्य पक्षीय नेताहरुलाई पनि सरकारमा पठाउने र जनपक्षीय संविधानका लागि दबाबमुलक कार्यक्रम तय गरेर अघि बढ्ने विषयमा आज पनि छलफल हुनेछ ।
वैद्य निकट पोलिटव्यूरो सदस्य खड्कबहादुर विश्वकर्माले कार्यदिशा, कार्यनीति, जनपक्षीय संविधान र विगतको समिक्षाका विषयमा ठोस प्रस्ताव तयार भएपछि मात्र केन्द्रीय समिति बैठक बस्ने जानकारी दिनुभयो ।
