काठमाण्डौ– एकीकृत नेकपा माओवादीका सचिव सीपी गजुरेलले सरकारको नेतृत्व गर्ने पालो नेपाली काग्रेसको भएको बताउनु भएको छ । रिपोर्टर्स क्लब नेपालले मंगलबार काठमाण्डौंमा गरेको साक्षात्कारमा गजुरेलले एमाले र माओवादीले दुई दुई पटक सरकारको नेतृत्व गरिसकेको अवस्थामा दोस्रो ठूलो दल काग्रेसले अबको नेतृत्व गर्न पाउनु स्वभाविक भएको बताउनुभयो ।प्रधानमन्त्री डा. बाबुराम भट्टराई नेतृत्वको सरकार सहमतिको सरकार बन्न नसक्ने ठोकुवा गर्दै गजुरेलले भन्नुभयो “काग्रेस र एमालेले बाबुराम जीको नेतृत्व नस्विकारे पछि यो सरकार कसरी राष्ट्रिय सरकार बन्न सक्छ ? कागताली परेर केही दिन सरकार टिक्न सक्ला तर यो सरकार सहमतिको सरकार बन्न सक्दैन ।”
उहाँले सहमतिको सरकार निर्माण भई शान्ति र संविधान जारी हुन नसक्ने ठोकुवा गर्दै माओवादीको नेतृत्वमा सहमतिको सरकार बन्ने अवस्थामा आफूहरुको विचार समूहको तर्फबाट महासचिव रामबहादुर थापा बादललाई प्रधानमन्त्रीको लागि प्रस्ताव गरिने बताउनुभयो ।
गजुरेलले पार्टी अध्यक्ष प्रचण्ड र उपाध्यक्ष बाबुराम भट्टराई प्रधानमन्त्री भईसकेको र बरिष्ठ उपाध्यक्ष मोहन बैद्यले चाहना नराखेकेकोले महासचिव बादलको दावी जायज हुने बताउनुभयो । उहाँले भन्नुभयो “बाबुराम जी नेतृत्वको सरकार असफल भईसकेपछि अब हाम्रो विचार समूहको दावी स्वभाविक हुन्छ ।”
