काठमाडौं– नेपाली काँग्रेसका केन्द्रीय पदाधिकारीहरुको आज सभापति सुशील कोइरालाको निवासमा बसेको अनौपचारिक बैठकले तरुण दल चितवनका अध्यक्ष शिवप्रसाद पौडेलको हत्या प्रकरणका बारेमा पार्टीले लिएको अडान र मागमा कायम नै रहने निर्णय गरेको छ ।पार्टीले मृतक पौडेललाई सहिद घोषणा गरी क्षतिपूर्ति दिनुपर्ने, पौडेलमाथि लगाइएको मुद्दा फिर्ता लिनुपर्ने, उच्चस्तरीय न्यायिक आयोग गठन गर्नुपर्ने र गृहमन्त्रीले राजीनामा दिनुपनर्पे माग हिजो राखेको थियो ।
सो माग पूरा नभए भोलि सोमबार नेपाल बन्दको आहृवान काँग्रेसले गरिसकेको छ । सरकारले ती मागमध्ये रु १० लाख क्षतिपूर्ति दिने र घटनाका बारेमा न्यायिक आयोग गठन गर्ने माग पूरा गरिसकेको छ ।
हत्याको मुद्दा लागि चितवन कारागारमा रहँदा गत मङ्सिर २० गते कारागारभित्रै आक्रमणमा परी घाइते भएका पौडेलको उपचारका क्रममा हिजो निधन भएको थियो ।
यस घटनालाई लिएर आज पनि राजधानीका त्रिचन्द्र क्याम्पस अगाडि नेपाल विद्यार्थी सङ्घका छात्रछात्राहरुले एक घन्टा यातायात अवरुद्ध गरी विरोध प्रदर्शन गरेका थिए ।
