टोकियो – राजधानी काठमाडौबाट प्रकाशित हुने कारोबार दैनिकका समाचार सम्पादक विजयबाबु खत्रीको सोमबार अपरान्ह रुपन्देहीको सालझण्डीमा कार दुर्घटनामा परी निधन भएको छ । पत्रकार खत्रीको असामयिक निधनप्रति नेपाल पत्रकार महासंघ जापान शाखाले एक शोक बिज्ञप्ती प्रकाशित गरी गहिरो दुख ब्यक्त गरेको छ । महासंघ जापानको तर्फ़बाट अध्यक्ष्य तिलक मल्लद्वारा जारी गरिएको शोक बिज्ञप्तीमा, पत्रकार खत्रीको निधनप्रति गहिरो शोक ब्यक्त गर्दै आर्थिक पत्रकारिताको क्षेत्रमा मात्र नभएर प्रवासी पत्रकारहरुमाझ राम्रो सम्बन्ध र सम्पर्क स्थापित गरेका खत्रीको निधनबाट डायस्पोरिक पत्रकारिताको क्षेत्रमासमेत अपूरणीय क्षति पुगेको बताईएको छ ।
यसैगरी प्रवासी नेपाली पत्रकार सञ्जालले पनि एक शोक बिज्ञप्ती प्रकाशित गरी पत्रकार खत्रीको असामयिक निधनप्रति गहिरो दुख ब्यक्त गर्दै प्रवासी पत्रकारहरुबीचको सहकार्य, एनआरएन अभियान र बैदेशिक रोजगार लगायतका बिषयमा बिशेष दखल राख्ने अर्थबिटमा सशक्त कलम चलाउदैं आएका पत्रकार खत्रीको निधनबाट नेपाली पत्रकार जगतलाई अपूरणीय क्षति पुगेको बताईएको छ । उक्त कुरा सञ्जालका तर्फबाट अध्यक्ष भूषण घिमिरेद्वारा प्रेषित बिज्ञप्तीमा जनाईएको छ ।
२०३४ असार १६ मा स्याङ्जाको खिलुङमा जन्मेका खत्री एनआरएनहरुबीच लोकप्रिय पत्रकार मानिन्छन् । समाचार संप्रेषणका उद्देश्यले उनी स्वदेश तथा बिदेशमा हुने एनआरएनका हरेक कार्यक्रममा सक्रिय सहभागिता जनाउँदै आईरहेका थिए ।
पत्रकार खत्रीको निधनले कारोबार दैनिकमात्र नभई सिंगो नेपाली आर्थिक तथा मूलधारको पत्रकारितामा अपूरणीय क्षति पुगेको भन्दै विभिन्न राजनीतिक दल, संघसंस्था तथा व्यक्तिले शोक विज्ञप्ती जारी गरेका छन् । खत्रीको निधनप्रति नेपाल पत्रकार महासंघ कारोबार शाखा, नेपाल आर्थिक पत्रकार समाज (सेजन), नेपाल पत्रकार महासंघ, नेपाल प्रेस युनियन, रिपोर्टस क्लब नेपालले विज्ञप्ति जारी गरी शोक व्यक्त गरेका छन् ।
नेपालगञ्जबाट काठमाडौं फ़र्कने क्रममा साइकल यात्रीलाई बचाउन खोज्दा कार दुर्घटनामा परि पत्रकार खत्रीको निधन भएको हो । विसं २०५४ बाट पत्रकारिता सुरु गरेका खत्री पछिल्लो दशक कान्तिपुर दैनिक तथा कान्तिपुर टेलिभिजनमा लामो समय आर्थिक पत्रकारिता गरेका थिए भने त्यसयता नागरिक दैनिक हुँदै साढे दुई वर्षदेखि कारोबार दैनिकमा कार्यरत थिए ।
पत्रकारितामा बजार, वैदेशिक रोजगार, सञ्चार, गैरआवासीय नेपाली अभियानमा विशेष दखल राख्ने खत्री रुपन्देही करहिया- ३ का स्थायी बासिन्दा हुन् ।
कारमा सवार ३५ वर्षिय विजयबाबु खत्री र साइकल चालक सालझण्डी ४ का ४० वर्षिय पूर्णबहादुर थारुको मृत्यु भएको हो । दुर्घटनामा परी कारोबारका संवाददाताहरु लीला घिमिरे, राधिका ढकाल, डीआर आचार्य, प्रकटकुमार शिशिर तथा प्रशासन शाखामा कार्यत युवराज कार्की घाइते भएका छन् । ***
