काठमाडौं- भ्रातृ संस्था विघटनपछि समस्या समाधानमा गम्भीर नभएको भन्दै नेता शेरबहादुर देउवा पक्षधरले लगातार केन्द्रीय समिति बैठक बहिष्कार गरेपछि सभापति सुशील कोइराला आक्रोसित भएका छन् ।कोइरालाले आफूलाई काम गर्न नदिने भए हटाउन चुनौति दिएको महामन्त्री प्रकाशमान सिंहले बताए । कोइरालाले केन्द्रीय समिति बैठक र आफू निकटका नेताहरुसँग देउवालाई उपयुक्त समझदारीमा आउन आग्रह गरेका छन् ।
‘मैले डेढ वर्ष सहकार्य गरेरै अघि बढ्न पर्खें,’ उनले बैठकमा भनेको उद्यृत गर्दै एक केन्द्रीय सदस्यले भने, ‘तर देउवाजीले पार्टीलाई ‘स्मुथली’ सञ्चालन गर्न सहयोग गर्नुभएन । अब मैले अगाडि बढ्न कि वास्ता नगनुपर्यो कि राजीनामा दिनु पर्यो ।’
कोइरालाले देउवाले आफूलाई अहिलेसम्म कहिल्यै सहयोग नगरेकोसमेत दाबी गरे । ‘मैले उहाँबाट कहिल्यै सहयोग पाइनँ,’ कोइरालाको भनाइ थियो ।
भ्रातृ संस्थाको नेतृत्व विघटनपछि उत्पन्न समस्या समाधान गर्न सभापति गम्भीर नभएको देउवा पक्षले बुधबार र शुक्रबारको बैठक बहिष्कार गरेको थियो । विघटनपछि अनसनमा बसेका कार्यकर्ता विरामी भएर अस्पताल पुर्याउँदा पनि कोइरालाले वास्ता नगरेपछि देउवाले केन्द्रीय सदस्यबाट राजीनामा दिएका थिए । राजीनामा भने ४५ दिनपछि अस्वीकृत भएको थियो ।
समस्या समाधान नभएसम्म केन्द्रीय समिति बैठक बहिष्कार गर्ने निर्णय भएको देउवा निकट केन्द्रीय सदस्य महालक्ष्मी उपाध्याय ‘डिना’ले जानकारी दिइन् । ‘बक्तव्यवाजी गरेर समस्या समाधान हुँदैन,’ उनले भनिन्, ‘समाधानका लागि ठोस पहल हुनुपर्यो ।’
देउवा समूहले बैठक बहिष्कार गरेपछि बुधबारको बैठकमा कोरम पुर्याउन कोइरालालाई कठीन भएको थियो । अन्तिममा बाहिर रहेका आफू निकट केन्द्रीय सदस्य सुजाता कोइराला र सुरेन्द्र चौधरीलाई विराटनगरलाई बोलाएर ७ घण्टा ढिलो कोरम पुर्याएर बैठक सुरु भएको थियो ।
शुक्रबार पनि बिहान ११ बोलाइएको बैठक कोरम नपुगेका कारण चार घण्टा ढिलो सुरु भएको थियो ।
