शुक्रबार, आषाढ ०७, २०८१
Friday, June 21, 2024
काठमाडौं- सर्वोच्च अदालतले ज्यान मुद्दामा सर्वस्वसहित जन्मकैदको फैसला सुनाएका माओवादी सभासद् बालकृष्ण ढुंगेललाई पक्राउ नगर्न प्रहरीलाई एमाओवादीका उच्च नेताहरुले दबाब दिएका छन्।
प्रहरी प्रधान कार्यालयमा आयोजित पत्रकार सम्मेलनमा प्रहरी प्रवक्ता विनोद सिंहले अदालतले दिएको आदेश फैसला र निर्णय कार्यान्वयन गर्न प्रहरी लागिरहने बताएपछि उनीहरुले प्रहरी प्रधान कार्यालयका उच्च प्रहरी अधिकारीहरुलाई फोन गरी त्यस्तो दबाब दिएका हुन्।
माओवादीविरुद्ध प्रहरी लागेको जनाउँदै उनीहरुले राजनीतिक विषय भएकाले राजनीतिक तहबाटै टुंग्याउने भएकाले प्रहरीले पक्राउ गर्न आवश्यक नभएको बताएका थिए। सरकारले ढुंगेललाई आममाफी दिन सिफारिस गरे पनि सर्वोच्च अदालतले मुद्दाको टुंगो नलागेसम्म सिफारिस कार्यान्वयन नगर्न आन्तरिम आदेश दिएको छ।
प्रहरीले भने फेला पार्न नसकेकाले ढुंगेललाई पक्राउ गर्न नसकेको बताए । ‘हामी पक्राउ गर्न जाछौं,’ सिंहले भने- ‘उहाँ त्यहाँबाट फरार भइसक्नुहुन्छ ।’
प्रहरीले पत्रकार सम्मेलन गरिरहँदा सभासद् ढुंगेल भने संसद् बैठकमा सहभागी भइरहेका थिए ।
तपाईको प्रतिक्रिया