मलेसिया- मलेसियामा ज्यान गुमाएका एक नेपालीको शव आठ महिना बित्दा पनि नेपाल ल्याउन सकिएको छैन । लमजुङको गौडा गाविस ९ का मनिराज घलेको शव आठ महिनादेखि मलेसियाको पेतालिङ्जयाको अस्पतालमा रहेको छ ।
चार वर्ष अघि भ्रमण भिसामा मलेसिया पुगेका मनिराज अवैधानिक रुपमा मलेसियामै कार्यरत रहेको रामचन्द्र नेपालले जानकारी दिनुभयो । अवैधानिक रुपमा अर्कै व्यक्तिको पासपोर्टको फोटोकपि पेस गरेर काम गरेको हुँदा मृतकको वास्तविक नाम र घरको ठेगाना नमिलेपछि शव नेपाल पठाउन समस्या परेको मृतकका दाजु गमबहादुर घलेले बताउनुभयो ।
मृतक घले गत वर्ष चैत २० गते देखि सम्पर्कबिहिन हुनुभएको थियो । त्यसको झण्डै दुई हप्ता पछि घले आफैले काम गर्ने घरको अन्डर ग्राउन्डमा झुन्डिएको अवस्थामा भेटिएको रामचन्द्र नेपालले जानकारी दिनुभयो । उहाँको मृत्युको कारण हालसम्म थाहा हुन सकेको छैन ।
आफ्ना भाईको शव नेपाल पठाउन सहयोग गरिदिन मृतकका दाजु गम वहादुरले सबैसँग अपिल गर्नुभएको छ ।
