काँग्रेस नेता देउवाको राजिनामा अस्वीकृत

काठमाडौं- नेपाली काँग्रेसका नेता शेर बहादुर देउवाले केन्द्रीय सदस्यबाट दिएको राजिनामा सभापति सुशील कोइरालाले अस्वीकार गरेका छन् । गत असोज ११ गते नेता देउवाले दिएको राजिनामा काँग्रेस सभापति सुशील कोईरालाले अस्वीकार गरेको नेपाली काँग्रेसले जनाएको छ ।

राजिनामा पत्र शनिबार नै नेता शेर बहादुर देउवालाई फिर्ता गरिएको काँग्रेस केन्द्रीय कार्यालयका मुख्य सचिव बसन्त कुमार गौतमले जानकारी दिनुभयो ।

भ्रातृ संघठनको नेतृत्व विघटन गरिएपछि विरोधमा पार्टी कार्यालय सानेपामा बसेका आफू समर्थक नेता कार्यकर्ताको स्वास्थ्य बिग्रँदासमेत कोइरालाले वास्ता नगरेको भन्दै देउवाले राजीनामा दिएका थिए ।

राजीनामापछि कोइराला र देउवाबीच बोलचाल नै बन्द हुने अवस्था सिर्जना भएको थियो ।