त्रिशुलीमा ट्रक खस्दा तीन जनाको ज्यान गयो

चितवन- मुग्लिन-नारायणघाट सडक खण्डको मुग्लिन नजिकै मंगलबार राति ट्रक त्रिशुली नदीमा खस्दा तीन जनाको ज्यान गएको छ । दुर्घटनामा एक जना बेपत्ता छन् भने अरु दुई जना घाइते भएका छन् ।

भैंसी लिएर काठमाडौंका लागि छुटेको ना २ ख ६९७१ नम्बरको ट्रक मंगलबार राती दुई बजेतिर मुग्लिन-नारायणघाट सडक खण्डको दारेचोक ४ बाट त्रिशुली नदीमा खसेको हो ।

दुर्घटनामा धादिङ मलेखुका पूर्ण श्रेष्ठ र भारतीय नागरिक मिराज खानको घटनास्थलमै र धनुषा महेन्द्रनगरका उमेश्वर यादवको भरतपुर मेडिकल कलेजमा उपचारका क्रममा ज्यान गएको जिल्ला प्रहरी कार्यालय चितवनले जनाएको छ । नवलपरासी दाउन्ने-५ का हिरे बिक बेपत्ता छन् । बेपत्ताको खोजी भइरहेको जिल्ला प्रहरी कार्यालय चितवनले जनाएको छ ।

घाइते चितवनको कठार-९ का सन्तोष सुनार र नवलपरासीको दाउन्ने ५ का जिवन विकको भरतपुरमा उपचार भइरहेको छ ।