काठमाडौं– एकीकृत नेकपा माओवादीका स्थायी समिति सदस्य नेत्रविक्रम चन्द ‘विप्लव’ले पार्टी छाड्ने तयारी गरेको भन्ने समाचारको खण्डन गरेका छन् ।
अध्यक्ष पुष्पकमल दाहाल ‘प्रचण्ड’ले पटक–पटक प्रसंसा गर्दै आए पनि धोकाधाडी गरेको आरोप लगाउने उनी पार्टी छाड्ने तयारीमा रहेको संस्थापन पक्षको प्रचार छ । उनीपक्षका नेता मोहन वैद्य ‘किरण’को आड पनि दह्रो नभएको भन्दै विप्लव पार्टी त्याग्ने सोचमा पुगिसकेको संस्थापन पक्षका नेताहरु बताउँछन् ।
विप्लवकै योजनामा भएको धोविघाट गठबन्धनबाट उपाध्यक्ष डा. बाबुराम भट्टराई ‘लालध्वज’ प्रधानमन्त्री भएपछि आफूलाई लात दिएको निष्कर्षमा पुगेका उनले आगामी राजनीतिक यात्राबारे भने केही बताएका छैनन् ।
यसैबीच विप्लवले भने पार्टी त्याग्ने भनाईलाई भने फरक तरिकाले विश्लेषण गरेका छन् । एभिन्यूज टेलिभिजनको कार्यक्रम संवादलाई दिएको अन्र्तवार्तामा उनले भने, ‘पार्टीले दमन गरिरहन्छ भने यसको विकल्प के त ?’
तर माओवादीबाट अलग भइहाल्ने विषयमा भने अहिल्यै नसोचेको उनले बताए । ‘यदि पार्टीभित्रैबाट यस्तो हल्ला चलाएको हो भने पराजित मानसिकताको उपज हो,’ उनले भने, ‘बाहिरबाट हो भने फुटाउने षड्यन्त्र हो ।’
