काठमाडौं- एकीकृत नेकपा (माओवादी)का अध्यक्ष पुष्पकमल दाहालले शान्ति र संविधानको लागि राजनीतिक दलहरुबीच फेरि एकचोटि १२ बुँदे सहमति गर्दाको समयको एकता र भावनाको आवश्यकता रहेको बताएका छन्।
व्यवस्थापिका संसद्को आजको बैठकमा बोल्दै अध्यक्ष दाहालले शान्ति र संविधानलाई निष्कर्षमा पुर्याउन १२ बुँदे गर्दाको एकता, सहमति र सहयोगको भावना राजनीतिक दलहरुमा अझै आवश्यक रहेको बताए। उनले प्रमुख चार राजनीतिक दलबीच भएको सातबुँदे सहमति ऐतिहासिक छ भने।
बाह्र बुँदे सहमतिपछि र त्यसपछिका सहमतिपछि साढे तीन वर्षसम्म दलहरुले बाटो बिराएको तथा सरकार बनाउने र गिराउने खेलमा मात्रै लाग्नुपरेकोमा उनले दुःख व्यक्त गरे।
‘सम्झौता गर्दा केही आफ्ना मागहरु छोड्नुपर्छ, राजनीतिक दलहरुले आफ्ना स्वार्थहरु छोडेर सहमति गर्न यसपटक फेरि सफल भएका छन्,’
अध्यक्ष दाहालले भने।
![prachanda-dahal](https://samudrapari.com/wp-content/uploads/2011/11/prachanda-dahal.jpg)
सङ्क्रमणकाल जति लम्बियो त्यति राजनीतिक दल, देश र जनतालाई असर पर्ने बताउँदै सातबुँदे सहमति गर्न राजनीतिक दलहरुले त्याग गरेको र शान्ति प्रक्रिया पूरा गर्न अझै त्यागको भावना आवश्यक छ भने।
ठूलो पार्टी भएको नाताले माओवादीले त्यागको भावना देखाएको र अरु दलले पनि त्याग देखाएको भन्दै अध्यक्ष दाहालले संविधानसभालाई सफल पार्न, संविधान बनाउन, लोकतन्त्रलाई संस्थागत गर्न र शान्ति प्रक्रियालाई सफल पार्न सहमतिलाई अवसरका रुपमा उपयोग गरेर कार्यान्वयनमा जोड दिनुपर्ने बताए।
माओवादी पार्टी फुटिहाल्छ र माओवादीभित्र भएको अन्तरविरोधलाई कसैले नाटक सोचेको छ भने त्यो पनि गलत हो भन्दै अध्यक्ष दाहालले इतिहासको यो सङ्क्रमणकालीन कालखण्डमा एकअर्कालाई सबैको सहयोगको खाँचो छ भने।
सङ्क्रमणकालको अन्त्य भएपछि सबै राजनीतिक दल आ-आफ्नै ढङ्गले अघि बढ्न सक्ने भएकाले केही समयसम्म सबै राजनीतिक दल एकजुट भएर समृद्ध नयाँ नेपाल निर्माणका लागि योगदान पुर्याउन उनले आग्रह पनि गरे।