टोकियो – दुई महिनाअघि मात्र कुक भिषामा जापानमा कामको लागि आएका ३३ बर्षीय बाग्लुङ गल्कोट निवासी चन्द्र घर्तिमगरको आइतवार नागोयामा मृत्यु भएको छ ।
सुरुमा ज्वरो आएको र खकारमा रगत समेत देखिएपछि क्षयरोगको आशंका गरिएकोमा अस्पतालमा स्वास्थ्य परीक्षण गराउँदा डाक्टरले मुटुको भल्ब फेर्नुपर्ने बताएका थिए । उनको १८ दिनअघिमात्र आइचीकेन अस्पतालमा शल्यक्रिया गरिएको थियो । शल्यक्रियापछि अचेत अबस्थामा रहेका घर्तिमगरको आईसीयुमा उपचार भइरहेको र उपचारको लागि सहयोग जुटाउन नेपाली समुदाय सक्रिय रहिरहेको अबस्थामा आइतवार निधन भएको एनआरएन जापान तोकाई होकुरिकुका उपसंयोजक बिष्णुप्रसाद घिमिरेले समुद्रपारिलाई बताउनुभयो ।
मृतक घर्तिमगरको नोभेम्बर १ तारिख मंगलवारका दिन अपरान्ह साढे २ बजे नागोयामा दाहसंस्कार गरिने भएको छ भने नागोया क्षेत्रमा रहेका नेपालीहरुलाई दाहसंस्कारमा उपस्थित हुन र बेसहारा बनेको घर्ति परिवारलाई सहयोग गर्न एनआरएन तोकाई होकुरिकुले आग्रह समेत गरेको छ ।
घर्तिमगरका तीन छोराछोरी र एक श्रीमति नेपालमै रहेका छन् ।
