बिहिबार, बैशाख १३, २०८१
Thursday, April 25, 2024
काठमाडौं नेपालीहरुको महान् चाड तिहारको चौथो दिन आज देशभरी परम्पराअनुसार दिदीबहिनीले दाजुभाइको सुख समृद्धि एवम् दीर्घायुको कामनाका साथ भाइटीका लगाउँदैछन् ।
भाइटीकाका लागि शुभसाइत बिहान ११ बजेर ५५ मिनेटमा सुरु हुने नेपाल पाचाङ्ग समितिले जनाएको छ । मुख्य साइतपछि पनि आज दिनभर नै टीका लगाउन शुभ हुने समितिले जनाएको छ ।
भाइटीका अगाडि दिदीबहिनीले यमराजको प्रार्थना तथा पूजा गरेर आफ्ना दाजुभाइलाई धार्मिक विधिअनुसार मण्डप बनाई अष्टचिरन्जीवीको पूजाकासाथ त्यसमा कहिल्यै नसुक्ने तेलको घेरा लगाई नओइलाउने दुबो मखमली र सयपत्री फूलको माला सप्तरङ्गी टीका लगाइदिएर चिरायुको कामना गर्छन् ।
दिदीबहिनीले आफ्ना दाजुभाइलाई मिठाइ फलफूल ओखर कटुस र मसलाका साथै सेलरोटी दिने तथा दाजुभाइले आफ्नो गच्छेअनुसार दक्षिणा तथा उपहार दिने चलन छ । पौराणिक मान्यताअनुसार यमुनाले आफ्ना दाजु यमराजलाई यसदिन विशेष सम्मानपूर्वक पूजाआजाकासाथ टीका लगाई दीर्घायुको कामना गरेकी हुँदा त्यसै घटनाको सम्झनामा दाजुभाईको दीर्घायुको कामना गर्दै दिदीबहिनीले भाईटीका लगाउने परम्परा चल्दै आएको हो ।
दिदीबहिनी नहुने दाजुभाइले आज काठमाण्डौको रानीपोखरीको बीचमा अवस्थित यमलेश्वर महादेव मन्दिरमा दर्शन गरी टीका लगाउने चलन छ । उक्त मन्दिर आज भाईटीकाको दिनमा मात्र सर्वसाधारणको लागि खुल्ला गरिन्छ ।
काठमाडौका नेवार समुदायलाई आज म्हपूजा र भोली भाई टीका गर्ने भएको छ । सरकारलॆ यसवर्षबाट भोली समेत सार्बजनिक विदा दिने निर्णय गरेको छ । ***

तपाईको प्रतिक्रिया