टोकियो– जापानमा गाडी उत्पादन गर्ने ठूलो संस्था निसानले हाल विश्वमा वातावरणमैत्री गाडीको माग बढेको अवस्थामा सन् २०१६ सम्म विश्वभर करिब १५ लाख इलेक्ट्रिक गाडी वितरण गर्ने योजना बनाएको जानकारी दिएको छ ।जापानमा टोयोटापछिको सबैभन्दा बढी गाडी उत्पादन गर्ने यस संस्थाले प्रदूषण उत्पादन नगर्ने गाडी सबैभन्दा बढी उत्पादन गर्ने लक्ष्य राखेको छ र यसका लागि डाइमलरसँग मिलेर सेलबाट निस्कने विद्युतबाट चल्ने गाडी विकास गरेको छ ।
निसानको ४३.८ प्रतिशत स्वामित्व फ्रान्सेली साझेदार रिनाउल्टको रहेको छ र यसले हालसम्म १५ हजार लिफ इलेक्ट्रिक कार बिक्री गरिसकेको छ । आउँदा दिनमा यसले नयाँ सातवटा यस्ता कारका मोडेल तयार गर्ने बताइएको छ ।
निसानका अध्यक्ष तथा प्रमुख कार्यकारी अधिकारी कार्लोस घोस्नले हाल यस प्रकारको गाडीको माग बढिरहेको र संस्थाले यसलाई अझै वातावरणमैत्री तथा बढी प्रभावकारी बनाउन प्रयास गरिरहेको जानकारी दिनुभयो ।
उहाँले यस कम्पनीले हाल उत्पादन गरिरहेको इन्धनबाट चल्ने गाडीलाई पनि सन् २००५ को तुलनामा ३५ प्रतिशत बढी इन्धन प्रभावकारी बनाइने जानकारी दिनुभयो ।
गत महिना निसानले अमेरिकी संस्था जनरल इलेक्ट्रिकसँग मिलेर विद्युतीय गाडी प्रवर्धन गर्ने साझेदारी गरेको थियो ।
