टोकियो–प्रतिनिधिसभा तथा प्रदेशसभामा वाम गठबन्धनले बहुमत ल्याएपछि एमाले अध्यक्ष केपी शर्मा ओलीलाई शनिबार उनकै निवास बालकोट पुगेर नेपालका लागि जापानका राजदूत मासाशी ओगावाले बधाई दिएका छन् ।
राजदूत ओगावासँगको भेटमा एमाले अध्यक्ष ओलीले आफू र आफ्नो गठबन्धन संविधान र कानुनको परिधिमा रहेर काम गर्ने बताए । आफूले भ्रष्टाचार न्यूनिकरण, विकास, समृद्धि, पारदर्शीता जस्ता कुरालाई प्राथमिकतामा राखेर अगाडि बढ्ने प्रतिबद्धता व्यक्त गरे । ओलीले भने, ‘हामी लोकतन्त्रका आधारभूत मूल्य मान्यता स्थापित गर्ने कुरामा प्रतिबद्ध छौं।’
राजदूत ओगावाले नेपालमा अब स्थायी सरकार निर्माण हुने अपेक्षा आफूले गरेको बताए । उनले नेपालको विकास निर्माणमा जापानले विगतदेखि नै गर्दै आएको सहयोगलाई निरन्तरता दिने प्रतिबद्धता व्यक्त गरे ।
जापानबाट आफूले सदाजस्तै विकास निर्माण, सामाजिक जनचेतना आदि क्षेत्रमा सहयोगहको अपेक्षा गरेको ओलीले बताए। ओलीले भने, ‘हामी सबै अन्तराष्ट्रिय छिमेकीको साथ सहयोग लिएर अघि बढ्न तयार छौं। ’
