शर्मासहित तीन जनाविरुद्ध १० अर्ब बढीको भ्रष्टाचार मुद्दा दायर

काठमाडौं – कर निर्धारणमा अनियमितता गरेको आरोपमा आन्तरिक राजस्व विभागका निलम्बित महानिर्देशक चूडामणि शर्मासहित ३ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । अख्तियारले आज शर्मासहित कर फर्स्योट आयोगका अध्यक्ष लुम्बध्वज महत र सदस्य उमेश ढकालविरुद्ध १० अर्ब ९६ करोड बिगो मागदाबी गर्दै विशेष अदालत काठमाडौंमा मुद्दा दर्ता गरेको हो ।

अख्तियारका अनुसार बिगो र जरिवाना मागदाबी गरेको कुल रकम जोड्ने हो भने त्यसको आकार झन्डै ३३ अर्बको हाराहारीमा पुग्नेछ । यो मुद्दा अहिलेसम्मकै ठूलो भ्रष्टाचार मुद्दा हो । अख्तियार दुरुपयोग अनुसन्धान आयोगको बिहीबार बसेको बैठकले शर्मासहित कर फरछर्योट आयोगका अध्यक्ष लुम्बध्वज महत र सदस्य उमेश ढकालविरुद्घ १० अर्ब ९६ करोड बिगो माग दाबी गर्ने निर्णय गरेको थियो ।

मुद्दा दायर गर्न अख्तियारले ३ सय पृष्ठको फाइल तयार गरेको छ । अख्तियारले आयोगबाट छुट दिएको २० अर्ब ९८ करोडमध्ये १० अर्ब २ करोड रुपैयाँमात्रै सदर गरेको र बाँकी १० अर्ब ९६ करोड रुपैयाँ गैरकानुनी रुपले छुट दिएको बताएको छ । अख्तियारले शर्मालाई गत जेठ १९ मा नियन्त्रणमा लिएको थियो । अख्तियारले विस्तृत छानबिन थाले देखि नै आयोगका अध्यक्ष महत र सदस्य ढकाल फरार छन् भने सदस्यसचिवसमेत रहेका चूडामणि शर्मा अख्तियारकै हिरासतमा छन् ।

तपाईको प्रतिक्रिया
© २०१६ सर्वाधिकार समुद्रपारिमा सुरक्षित