शुक्रबार, चैत्र १६, २०८०
Friday, March 29, 2024

काठमाडौं  – नेपालमा भूकम्प मापन गर्ने थप १८ केन्द्र स्थापना गरिने भएको छ । २०७२ वैशाख १२ गतेको भूकम्पपछि विभिन्न देशको सहयोगमा थप १८ केन्द्र स्थापना गर्न लागिएको हो ।

राष्ट्रिय भूकम्प मापन केन्द्रका सिस्मोलोजिष्ट भरतप्रसाद कोइरालाले अहिले देशभर २१ केन्द्र रहेको र थप १८ केन्द्र थपिन लागेको जानकारी दिनुभयो । उहाँले भन्नुभयो “सन २०१८ सम्म चीन सरकारले १०, थाइल्यान्डको रायम्स कम्पनीले चार र जापान सरकारले आठ केन्द्र बनाउन सहयोग दिनेछन् ।”

केन्द्रले ‘गोरखा भूकम्प’ पछि नेपालमा गएका भूकम्पको धक्का प्रशोधन कार्य (अभिलेख राख्ने काम) गरिरहेको छ । केन्द्रका अनुसार २०७२ वैशाख १२ गते गएको भूकम्पपछि अहिलेसम्म नेपालमा ३० हजारभन्दा बढी भूकम्प तथा परकम्प गइसकेको छ ।

कोइरालाले गोरखा भूकम्पपछि अहिलेसम्म ४ रेक्टर स्केलभन्दा माथिका ४७९ र त्योभन्दा तलका ३० हजारभन्दा बढी परकम्प गएको बताउनुभयो ।

वैशाख १२ गते गएको भूकम्पपछि दैनिक सयौं परकम्प गएको र त्यसको अभिलेख राख्न नसकेकाले अहिले केन्द्र अभिलेख राख्ने काम जुटिरहेको छ ।

उहाँले भन्नुभयो “देशभरका केन्द्रबाट आएका तथ्याङ्कको प्रशोधन गरिरहेका छौं । अहिलेसम्म झण्डै २० हजार परकम्पको प्रशोधनको काम भइसक्यो ।”

नेपालमा सन् १९७८ मा फ्रान्स सरकारको सहयोगमा ललितपुरको फुल्चोकीडाँडामा भूकम्प मापन केन्द्रको स्थापना भएको थियो । नेपालमा अहिले पूर्व ताप्लेजुङदेखि पश्चिम बैतडीसम्म २१ केन्द्रबाट भूकम्प मापन हुँदै आएको छ ।

तपाईको प्रतिक्रिया