आईजीपी नियुक्ति विवादबारे सर्वोच्चले आज फैसला गर्दै

काठमाडौं – नेपाल प्रहरीको महानिरीक्षक (आईजीपी) नियुक्तिबारे सर्वोच्च अदालतले आज फैसला गर्ने भएको छ । सोमबार पूर्ण इजलासमा बहस सकिएपछि अदालतले आज फैसला गर्न लागेको हो ।

सोमबार प्रधानन्यायाधीश सुशीला कार्की नेतृत्वको पूर्ण इजलासमा भएको बहसमा सरकारी वकिलको तर्फबाट दुई उपमहान्यायाधिवत्ता टीकेन्द्र दाहाल र रेवती त्रिपाठीले बहस गर्नुभएको थियो ।

रिट निवेदन कपिलदेव ढकाल र डीआईजी नवराज सिलवालका वकिलले आइतबार नै बहस गरेका थिए । सिलवालका तर्फबाट बद्रीबहादुर कार्की, तुलसी भट्ट, भीमार्जुन आचार्य र टिकाराम भट्टराईले बहस गर्नुभएको थियो ।

सरकारले माघ ३० गते डीआईजी चन्दलाई प्रहरी महानिरीक्षकमा बढुवा गरेको थियो । तर, ढकालले दायर गरेको रिटमा प्रधानन्यायाधीश कार्कीको एकल इजलासले त्यही दिन निर्णय कार्यान्वयन नगर्न अन्तरिम आदेश दियो ।

प्रहरी प्रमुखका अर्का दावेदार सिलवालले पनि माघ ३० गते नै अर्को रिट दायर गरेका थिए । त्यसमा पनि प्रधानन्यायाधीश कार्कीकै इजलासले सुुनुवाई गर्दै चन्दलाई पदस्थापन नगर्न अर्को आदेश दिएको थियो ।

फागुन १८ गते हरिकृष्ण कार्की र तेजबहादुर केसीको संयुक्त इजलासले अन्तरिम आदेशलाई निरन्तरता दिएको थियो ।

तपाईको प्रतिक्रिया
© २०१६ सर्वाधिकार समुद्रपारिमा सुरक्षित