काठमाडौं – एसिसी एसिया कप ट्वान्टी–ट्वान्टी महिला क्रिकेटमा नेपालले लज्जास्पद हार बेहोरेको छ ।
आज भएको पाँचौ खेलमा नेपाल भारतसँग ९९ रनले पराजित भएको हो । नेपालको यो लगातार पाँचौ हार हो । भारतले प्रस्तुत गरेको १२१ रनको लक्ष्य पछ्याएको नेपाल १६.३ ओभरमा २१ रनमै अलआउट भयो जुन नेपालको सबैभन्दा कम स्कोर हो । नेपालका लागि सरिता मगरले बनाएको ६ रननै सबैैभन्दा धेरै भयो । करुणा भण्डारी, रुविना क्षेत्री र ज्योति पाण्डेले समान दुई दुई रन बनाए । 
नेपालका चारजना खेलाडी डक आउट भएको खेलमा रोशनी बोहोरा र सीता रानामगरले एक एक रन बनाए । पहिले ब्याटिङ गरेको भारतले २० ओभरमा ५ विकेट गुमाएर १२० रन बनाएको थियो । भारतका लागि शिखा पाण्डेले सर्वाधिक ३९ रन बनाइन् । त्यस्तै भेल्लसमी भनिताले २१, अनुजा पटिलले १६, हार्मनप्रित काउरले १४, नुहाज प्रविनले १३, मनिशी जोशीले ५ र सविन्नी मेगानले ४ रनको योगदान गरे ।
सबै खेलमा हारे बेहोरेको नेपाल अब घर फर्कने भएको छ । नेपालले पहिलो खेलमा पाकिस्तानसँग ९ विकेटले, दोस्रो खेलमा श्रीलंकासँग ८ विकेटले, तेस्रो खेलमा बंगलादेशसँग ९२ रन र चौथो खेलमा थाइल्याण्डसँग ८ विकेटले पराजित भएको थियो ।
