काठमाडौं- नेपाली व्यवसायी एवं समाजसेवी राजा घले ‘हिरो अफ दि इयर–२०१३’ द्वारा सम्मानित भएका छन् ।नेपाली समुदायको भलाइका लागि सक्रिय भएको भन्दै घलेलाई नेप्लिज एसोसिएसन अफ जर्जियाले सो सम्मान प्रदान गरेको हो । संस्थाको वार्षिक भेलाको अवसरमा हालै एटलान्टामा आयोजित एक कार्यक्रममा घलेलाई सो सम्मान प्रदान गरिएको हो । सो अवसरमा स्थानीय बुद्धिजीवीद्वय डा.प्रह्लाद पन्त र रामचन्द्र बरालले घलेलाई टीका र खादा लगाएर सम्मान गरेका थिए ।
संस्थाले सम्मान प्रदान गरेकोमा आभार व्यक्त गर्दै घलेले आजीवन समाजसेवामा लाग्ने प्रतिबद्धता व्यक्त गरेका थिए । उनले संस्थाका नवनिर्वाचित अधिकारीलाई शुभकामना दिँदै भविष्यमा निःस्वार्थ भएर काम गर्न सल्लाह दिए । घलेले स्थानीय, क्षेत्रीय, राष्ट्रिय र अन्तर्राष्ट्रिय संघ÷संस्थामा आबद्ध भई सामाजिक कार्यमा आफूलाई आबद्ध बनाउँदै आएका छन् ।
एसियन प्यासिफिक अमेरिकन काउन्सिल (एप्याक) का महासचिवसमेत रहेका घलेले अमेरिकी संस्था नेप्लिज एसोसिएसन इन साउथ इस्ट एसिया (नासा) को अध्यक्ष भएर योगदान दिइसकेका छन् ।
