पर्सा- वीरगन्जमा आज बिहान एक श्रीमान्ले आफ्नै गर्भवती श्रीमतीको हत्या गरी फरार भएका छन् ।चार महिनाको गर्भवती रहेकी सोनीदेवी गोसाईलाई उनकै श्रीमान् भारत बिहार पश्चिमिचम्पारण बेतिया थान बसवारिया गाउँ निवासी बादल गोशाई (दास) ले आज बिहान डोलीले घाँटी थिची हत्या गरी फरार भएका हुन् ।
केही दिनअघि उपचारका लागि बीरगन्ज उपमहानगरपालिका -५ भगवतीटोलमा अवस्थित माइती आएकी सोनीसँग भेट्न शुक्रबार ससुराली आएका श्रीमान् बादद र सोनी राति एउटै कोठामा सुतेको र आज बिहान १० बजेसम्म सोनी बसेको ढोका नखुल्दा चिन्ता भई कोठाको ढोका फोडेर हेर्दा उनी ओछयानमा मृत अवस्थामा फेलापरेको र श्रीमान् कोठाको झयालबाट फरार भएको मृतकका मामा शर्मा गोशाईले जानकारी दिनुभयो ।
सानै उमेरमा पिताको मृत्यु भएकी सोनीको गत वैशाखमा भारतीय नागरिक बादलसँग विवाह भएको थियो ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक रवीन्द्र केसीले घटनाको अनुसन्धान भइरहेको बताउनुभयो । मृतकको घाँटीमा डोरीको गहिरो डाम रहेकाले उनको हत्या श्रीमान्ले नै गरी फरार भएको हुनसक्ने आशङ्का प्रहरीको रहेको छ ।
मृतक सोनीको शव परीक्षणका लागि बीरगन्जको नारायणी उपक्षेत्रीय अस्पतालमा राखिएको प्रहरीले जनाएको छ ।
