काठमाडौं – नेपाल टेलिभिजनबाट प्रसारण हुने हाँस्य टेलिश्रृखंला मेरी बास्सै संकटमा परेको छ । मेरी बास्सैका निर्देशकद्वय सिताराम कट्टेल धुर्मुस र केदार घिमिरे माग्ने बुढाबीच खटपट चुलिएपछि मेरी बास्सैको सुटिङ्ग नै रोकिएको छ ।
३ हप्तादेखि मेरी बास्सैको नयाँ सुटिंग हुन सकेको छैन । त्यसैले प्रत्येक शनिवार राति पौने नौ बजे प्रसारण हुने मेरी बास्सैमा पछिल्ला ३ वटा भाग पुरानै दोहोर्याईएको छ । माग्ने बुढा र धुर्मुसबीच आफू आफूमा पनि प्रतिस्पर्धा भएको छ । त्यसैले धुर्मुस आफै नै धेरै भूमिकामा देखिन थालेका छन भने माग्ने बुढाले पनि विल्सनविक्रम राई तक्मे बुढालाई राखेका छन् ।
आन्तरिक झगडाकै कारण यी २ ले एउटै हास्य श्रृंखला पनि विगत केही बर्षदेखि छुट्टाछुट्टै सुटिङ्ग गर्दै आएका थिए । तर सिताराम कट्टेल अर्थात धुर्मुसले भने लगातारको हडताल र व्यस्तताले नयाँ श्रृखला सुटिङ्ग गर्न नपाएकोले पुरानै श्रृखला दोहोर्याएको बताए । तर नेपाल टेलिभिजनसँग समय किनेर मेरी बास्सै कार्यक्रम प्रस्तुत गर्दै आएको विज्ञापन एजेन्सी मिडिया हवले भने धुर्मुस र माग्ने बुढाबीचको विवादले कार्यक्रम बन्द हुने स्थितिमा आएको जनाएको छ ।
मिडिया हवका एक कर्मचारीकाअनुसार शनिवार माग्ने बुढा र धुर्मुसबीच ठूलो झगडा भयो अनि कार्यक्रम पुरानै देखाउन भनेकाले त्यसो गरिएको हो । उनकाअनुसार असार महिनासम्म नै मेरी बास्सैका पुरानै भाग देखाइने छ ।
साउनदेखि नयाँ आर्थिक वर्ष लाग्ने र नेपाल टेलिभिजनसँग नयाँ सम्झौता गर्नुपर्ने भएकाले मिडिया हब मेरी बास्सैलाई निरन्तरता दिने वा नदिने भन्ने निर्णयमा भने पुगिसकेको छैन । नेपाल टेलिभिजनले पनि साउनदेखिका लागि टेलिश्रृंखला प्रसारणका लागि नयाँ टेण्डर आह्वान गरिसकेको छ । माग्ने बुढा र धुर्मुसले भने एक्ला एक्लै नयाँ हास्य श्रृखला निर्माण गर्ने तयारी गरिरहेको मेरी बास्सैका एक कलाकारले जानकारी दिए । ***
