दाङ- नेकपा एमालेका सचिव युवराज ज्ञवालीले माओवादीले नेपाली सेनामा आफ्नो पार्टीको प्रभाव कायम गर्ने षडयन्त्र गरिरहेको आरोप लगाएका छन् । उनले माआवादीले सेना समायोजनका क्रममा महानिर्देशनालयको दोस्रो दर्जा माग्नु सेनामा आफनो प्रभाव कायम गर्ने चाल भएको दाबी गरे ।रिपोर्टर्स क्लब नेपाल, दाङले तुलसीपुरमा आयोजना गरेको साक्षात्कारमा बोल्दै नेता ज्ञवालीले सेनामा कुनै पनि हालतमा राजनीतीकरण गर्न नदिने स्पष्ट पारे । उनले सेनालाई पूर्णरुपमा व्यावसायिक र लोकतान्त्रीकरण गर्न आफूहरु तयार रहेको भन्दै राजनीतीकरण गर्न भने नहुने सुझाव दिए । उनले सेना समायोजनमा माओवादीभित्र ठूलै अन्यौल रहेको भन्दै पार्टीमा काम गरेको आधारमा सेना हुन नसक्नेसमेत स्पष्ट पारे ।
अर्को एक प्रसङ्गमा नेता ज्ञवालीले नेपाली राजनीति विराट सम्भावना र चुनौतीको दोसाँधबाट अघि बढिरहेको भन्दै माओवादीले ७ बुँदे सहमति पालना गरे वर्तमान समस्या समाधान हुने बताए । उनले माओवादीमा उग्रवामपन्थी चिन्तन, एकदलीय तानाशाही सोच र हतियारप्रतिको मोह कायम रहेसम्म मुलुकले निकास नपाउने दाबी गरे ।
नयाँ संविधानमा मिश्रित निर्वाचन प्रणाली राख्न दलबीच सहमति हुने विश्वास व्यक्त गर्दै उनले शासकीय स्वरुपमा पनि एमालेले राखेको प्रत्यक्ष निर्वाचित प्रधान मन्त्री र संवैधानिक राष्ट्रपति उत्तम विकल्प रहेको बताए । उनले संविधान निर्माणमा अबको जटिल विषय भनेको राज्य पुनर्संरचनामात्र रहेको भन्दै त्यस विषयमा दलहरुले गम्भीररुपमा छलफल अगाडि बढाउनुपर्ने धारणा राखे ।
