टोकियो – सोमबार बिहान ४ बजे ओसाकामा रहस्यमय ढंगबाट हत्या भएका बिष्णु धमलाको लास नेपाल पठाईने भएको छ ।
आइतबार राती माघेसंक्रान्ति मान्ने क्रममा अबेरसम्म रेष्टुरेन्टमै खाईपिई गरी बिहानको ४ बजेतिर कोठामा फ़र्कनेक्रममा उनीमाथि ४ जनाको समूहले आक्रमण गरी धमलाको हत्या गरेका थिए ।
ओसाकाको तेन्नोजी सिटीको मात्सुजाकी चो मा पर्ने नेपाली भान्साघर नामको रेष्टुरेन्टका मालिक धमलालाई आक्रमणकारीहरुले पछाडिबाट अन्धाधुन्ध कुटपिट गरी हत्या गरेका थिए । प्रहरीले धमलाको लासलाई आजदेखि आफन्तको जिम्मा लगाएको ओसाकाबाट हाम्रा सहकर्मी तुल्सीराम खरेलले बताएका छन् । स्व. धमलाकी जापानी पत्नी र उनका भाञ्जाले लास जिम्मा लिई नेपाल लैजाने भएका हुन् ।
उनको लास नेपाल पुर्याउने लगायतका आपतकालिन कार्यमा राहत होस् भन्ने हेतुले कान्साईबासी नेपालीहरुले करिव २ लाख २५ हजार येन आर्थिक सहयोग पनि जुटाई हस्तान्तरण गरेका छन् ।
धमलाको रहस्यमय हत्याको कारण भने अझै पुष्टि हुन सकेको छैन । अपरिचित जापानीहरुले रातको बेला बिनाकारण किन र कसरी धमलाको ज्यानै लिने सम्मको हर्कत गरे भन्ने रहस्यको पोको भने अझै खुल्न सकेको छैन । धमलाको हत्याको बिरोधमा उत्रेका यहाँका नेपालीहरुले सबै हत्यारालाई पत्ता लगाई हदैसम्मको कार्वाही गरिनुपर्ने माग गर्दै आईरहेका छन् ।
शान्ति सुरक्षाको दृष्टिले संसारमै कहलिएको देश जापानमा सानोतिनो आफ्नै ब्यवसाय चलाएर बसेका धमलालाई ज्यानै लिनेसम्मको घटना हुनुमा कुनै न कुनै कारण हुनुपर्छ भन्ने अड्कल लगाउनु अस्वभाविक मान्न सकिन्न । जापानजस्तो मुलुकमा यसको उचित छानबिन र अनुसन्धान होला नहोला त्यो भने हेर्न बाँकी छ तर सत्य र न्यायको पक्षमा आवाज बुलन्द गरेर फेरि एक पटक नेपाली एकताको प्रदर्शन गर्ने बेला भने अवश्य आएको छ । ***
